پنڈت نہرو کی برسی پر جے رام رمیش کا بیان، ’نہرو کی وراثت کو مٹانے کی کوششیں ناکام رہیں‘

اپنے بیان میں جے رام رمیش نے کہا کہ پنڈت نہرو ہندوستان کے ایسے رہنما تھے جو نہ صرف جدید ہندوستان کے معمار کہلائے، بلکہ ایک وسیع النظر، فراخ دل اور سادہ مزاج انسان بھی تھے۔ انہوں نے کہا کہ نہرو کو بدنام کرنے، ان کی وراثت کو بگاڑنے اور کم کرنے کی کئی کوششیں ہوئیں، خاص طور پر 2014 کے بعد لیکن یہ تمام کوششیں ناکام رہیں کیونکہ نہرو آج بھی کروڑوں ہندوستانیوں کے دل و دماغ میں زندہ ہیں۔

جے رام رمیش کے مطابق نہرو ایک مضبوط مگر جمہوری ذہن کے حامل رہنما تھے۔ ’’ان کے پاس مکمل اختیارات تھے لیکن وہ کبھی آمر نہیں بنے۔ نہ انہیں اپنے آپ کو ثابت کرنے کے لیے بڑھا چڑھا کر باتیں کرنے کی ضرورت تھی اور نہ ہی وہ خودنمائی کے قائل تھے۔ وہ تاریخ کو سمجھنے، لکھنے اور اس کی سمت طے کرنے والے دانشور بھی تھے اور ایک شائستہ، حساس اور باشعور شخصیت بھی۔‘‘