مہر خبررساں ایجنسی کی رپورٹ کے مطابق، شہید آیت اللہ سید ابراہیم رئیسی کی پہلی برسی کی مناسبت سے منعقدہ تقریبات کے سلسلے میں اُن کی صاحبزادی سیدہ ریحانہ سادات رئیسی پاکستان کے دورے پر لاہور پہنچیں۔ اس موقع پر انہوں نے معروف دینی و علمی ادارے جامعہ عروۃ الوثقیٰ کا خصوصی دورہ اور شہدائے خدمت کی برسی کی مناسبت سے منعقدہ تقریب سے خطاب کیا۔
تقریب میں دینی، تعلیمی، سماجی شخصیات سمیت بڑی تعداد میں طلباء و طالبات اور علمائے کرام نے شرکت کی۔
سیدہ ریحانہ سادات رئیسی نے تقریب سے خطاب کرتے ہوئے اپنے عظیم والد کی شہادت، ان کی دینی و سیاسی خدمات، اور امت مسلمہ کے لیے ان کے فکری و نظری پیغام پر تفصیلی روشنی ڈالی۔
انہوں نے کہا کہ شہید رئیسی نے ہمیشہ اسلامی وحدت، مظلوموں کی حمایت اور عالمی استعمار کی مخالفت کا علم بلند رکھا، اور انہی اصولوں پر عمل پیرا ہو کر وہ شہادت کے عظیم رتبے پر فائز ہوئے۔
انہوں نے پاکستانی عوام اور علماء کی جانب سے ملنے والی محبت، خلوص اور عقیدت پر گہری مسرت و شکریہ کا اظہار کیا اور کہا کہ پاکستان اور ایران کے درمیان برادرانہ تعلقات کو فروغ دینا وقت کی اہم ضرورت ہے۔
جامعہ عروۃ الوثقیٰ کے سربراہ علامہ سید جواد نقوی نے بھی تقریب سے خطاب کیا اور شہید رئیسی کو خراجِ عقیدت پیش کرتے ہوئے کہا کہ اُن کی شخصیت عالم اسلام کے لیے مشعلِ راہ ہے۔
تقریب کا اختتام دعائیہ کلمات اور شہداء کی بلندی درجات کے لیے دعا پر ہوا۔
