آئی پی ایل 2025: حیدر آباد نے لکھنؤ کے لیے ’پلے آف‘ کا راستہ کیا بند، 6 وکٹ سے دی شکست

آئی پی ایل 2025 اپنے آخری مراحل میں داخل ہو چکا ہے، اور ہر میچ کے ساتھ ٹیموں کے ’پلے آف‘ میں پہنچنے یا پھر ’پلے آف‘ کی دوڑ سے باہر ہونے کا سلسلہ بھی تیز ہو گیا ہے۔ آج لکھنؤ اور حیدر آباد کے درمیان میچ کھیلا گیا جس میں رنوں کی خوب بارش ہوئی۔ پہلے سے ہی ’پلے آف‘ کی دوڑ سے باہر ہو چکی حیدر آباد نے آج لکھنؤ کو 6 وکٹوں سے شکست دے کر اسے بھی ’پلے آف‘ کی دوڑ سے باہر کر دیا ہے۔ یعنی اب تک 5 ٹیمیں پلے آف کی دوڑ سے باہر ہو چکی ہیں، جبکہ 3 ٹیمیں ’پلے آف‘ میں داخل ہو چکی ہیں۔ ’پلے آف‘ کے لیے اب محض ایک پوزیشن خالی ہے اور 2 ٹیموں (دہلی اور ممبئی) کے درمیان سخت مقابلہ ہے۔

آج ٹاس حیدر آباد کے کپتان پیٹ کمنز نے جیتا تھا اور پہلے گیندبازی کا فیصلہ کیا تھا۔ لکھنؤ کی شروعات بہت اچھی رہی، کیونکہ سلامی بلے بازوں نے پہلے وکٹ کے لیے 115 رنوں کی شراکت داری کی۔ مشیل مارش نے 39 گیندوں پر 65 رن اور ایڈن مارکرم نے 38 گیندوں پر 61 رنوں کی شاندار اننگ کھیلی، لیکن کپتان رشبھ پنت (6 گیندوں پر 7 رن) ایک بار پھر ناکام رہے۔ نکولس پورن (26 گیندوں پر 45 رن) نے آخر میں طوفانی اننگ کھیل کر ٹیم کا اسکور 200 کے پار پہنچانے میں بھرپور مدد کی، ورنہ مزید کسی بلے باز نے اچھی بلے بازی نہیں کی۔

گیندبازی میں حیدر آباد کی جانب سے ایشان ملنگا نے 4 اوورس میں 28 رن دے کر سب سے زیادہ 2 کھلاڑیوں کو آؤٹ کیا۔ 1-1 وکٹ ہرش دوبے (4 اوورس میں 44 رن)، ہرشل پٹیل (4 اوورس میں 49 رن) اور نتیش کمار ریڈی (2 اوورس میں 28 رن) کو ملے۔ پیٹ کمنز (4 اوورس میں 34 رن) اور ذیشان انصاری (2 اوورس میں 22 رن) وکٹ سے محروم رہے۔

حیدر آباد کی بلے بازی جب شروع ہوئی تو سلامی بلے باز اتھرو تائیڈے محض 13 رن بنا کر پویلین لوٹ گئے۔ حالانکہ سلامی بلے باز ابھشیک شرما (20 گیندوں میں 59 رن) نے ایک بار پھر طوفانی نصف سنچری بنائی اور ایشان کشن کے ساتھ دوسرے وکٹ کے لیے 82 رنوں کی شراکت داری کی۔ ایشان کشن نے 28 گیندوں پر 35 رنوں کی اننگ کھیلی، جبکہ ہنرک کلاسین نے 28 گیندوں پر 47 رن بنائے اور نصف سنچری بنانے سے محروم رہ گئے۔ کمنڈو مینڈس ریٹائرڈ ہرٹ ہوئے، جنھوں نے 21 گیندوں میں انتہائی اہم 32 رن بنائے۔ اس کے بعد مزید کوئی وکٹ نہیں گرا اور 18.2 اوورس میں محض 4 وکٹ کے نقصان پر ہی حیدر آباد نے ضروری 206 رنوں کا ہدف حاصل کر لیا۔ لکھنؤ کی جانب سے اسپنر دگویش راٹھی نے 2 وکٹ لیے، جبکہ وِل او رُرکی اور شاردل ٹھاکر کو 1-1 وکٹ ملے۔