جھگی باشندوں پر بلڈوزر چلا کر بی جے پی حکومت ’جہاں جھگی، وہاں مکان‘ کے وعدہ سے منحرف ہو رہی: کانگریس

نئی دہلی: راجدھانی دہلی مین بی جے پی حکومت آنے کے بعد سے جھگی بستیوں پر لگاتار چل رہی بلڈوزر کارروائی پر گھمسان تیز ہوتا دکھائی دے رہا ہے۔ دہلی کانگریس کے سینئر ترجمان ڈاکٹر نریش کمار نے ان کارروائیوں پر تلخ حملہ کرتے ہوئے کہا کہ ’’جہاں جھگی، وہاں مکان کا وعدہ کر کے ووٹ لینے والی بی جے پی حکومت اب انہی جھگی باشندوں کے سر سے چھت چھین رہی ہے۔ یہ نہ صرف انتخابی دھوکہ ہے بلکہ انسانیت کے ساتھ ایک ظالمانہ مذاق بھی ہے۔‘‘

ڈاکٹر نریش کمار نے ایک پریس بیان جاری کرتے ہوئے کہا کہ پرانا سیلم پور (ریلوے لائن)، تیمور نگر، شاستری پارک (مچھلی مارکیٹ) جیسے علاقوں میں جس بے رحمی سے بلڈوزر چلایا گیا، اس نے بی جے پی کا اصلی چہرہ عوام کے سامنے ظاہر کر دیا ہے۔ انھوں نے الزام عائد کیا کہ یہ حکومت صرف امیروں کی ہے، غریبوں کے لیے نہ اس کے پاس دل ہے، نہ پالیسی۔

کانگریس ترجمان نے کچھ اہم سوال بھی اٹھائے۔ انھوں نے پوچھا کہ اگر یہ جھگیاں ناجائز تھیں تو یہاں شہری سہولیات کیوں دی گئیں؟ لوگوں کے گھروں پر بجلی کے میٹر لگائے گئے، مقامی لوگوں کے پاس ووٹر شناختی کارڈ، آدھار کارڈ، راشن کارڈ سبھی طرح کے سرکاری کاغذات موجود تھے۔ انھوں نے یہ بھی کہا کہ پارٹی ہر اس کنبہ کے ساتھ کھڑی ہے جسے اس کارروائی کے سبب بے گھر کر دیا گیا ہے۔ انھوں نے مطالبہ کیا کہ بے گھر کیے گئے سبھی کنبوں کو فوراً متبادل رہائش دستیاب کرائی جائے، متاثرین کو مناسب معاوضہ دیا جائے، بلڈوزر کارروائی پر فوری روک لگائی جائے، اور کارروائی کی عدالتی جانچ کرائی جائے۔