اتراکھنڈ: کیدارناتھ میں لینڈنگ کے دوران حادثہ، ہیلی کاپٹر کا پچھلا حصہ ٹوٹا، پائلٹ اور ڈاکٹرز بال بال بچے

اتراکھنڈ کے کیدارناتھ دھام میں ہفتہ کو ایک ہیلی کاپٹر (ایئر ایمبولنس) لینڈنگ کے دوران حادثہ کا شکار ہو گیا۔ ہیلی کاپٹر میں پائلٹ سمیت 3 افراد سوار تھے۔ غنیمت رہی کہ یہ سبھی صحیح سلامت باہر نکل آئے۔ گڑھوال کمشنر ونئے شنکر پانڈے کے مطابق موقع پر راحت اور بچاؤ کام شروع کر دیا گیا ہے۔ اطلاع کے مطابق یہ ایئر ایمبولنس رشی کیش ایمس سے کیدارناتھ دھام آ رہا تھا۔

کیدارناتھ ہیلی پیڈ پر لینڈنگ کرتے وقت کوئی تکنیکی خرابی آنے کی وجہ سے ہیلی کاپٹر کا توازن بگڑ گیا لیکن پائلٹ کی ہوشیاری سے ایک بڑا حادثہ ہوتے ہوتے بچ گیا۔ یہ ایئر ایمبولنس کیدارناتھ دھام ایک مریض کو لینے کے لیے پہنچا تھا۔ گڑھوال انتظامیہ کے مطابق ایئر ایمبولنس نے رشی کیش ایمس سے کیدارناتھ کے لیے پرواز بھری تھی۔ ہیلی کاپٹر ہیلی پیڈ پر تقریباً لینڈ کر چکا تھا، اسی دوران توازن بگڑنے کی وجہ سے یہ سیدھے نیچے اتر گیا۔

حادثہ کے وقت اس میں 2 ڈاکٹر اور ایک پائلٹ سوار تھے۔ انتظامیہ کے مطابق تینوں لوگ پوری طرح سے محفوظ ہیں۔ واقعہ ہفتہ کی دوپہر تقریباً 12 بجے پیش آیا۔ اس حادثہ میں ہیلی کاپٹر بُری طرح تباہ ہو گیا۔ گڑھوال ضلع انتظامیہ کے مطابق حادثے کی وجوہات کی جانچ شروع کر دی گئی ہے۔ ابھی تک صاف نہیں ہو سکا ہے کہ یہ حادثہ کیسے ہوا۔

 کیدار وادی میں ہیلی کاپٹر حادثہ کا یہ کوئی پہلا معاملہ نہیں ہے۔ اس سے پہلے بھی کئی مرتبہ یہاں حادثے ہو چکے ہیں۔ گزشتہ سال ہی یہاں ایک ہیلی کاپٹر کریش ہوا تھا۔ اس حادثہ میں ہیلی کاپٹر پر سوار سبھی 5 لوگوں کی موت ہو گئی تھی۔ اس وقت بھی ہیلی کاپٹر رشی کیش ایمس سے کسی مریض کو لینے کے لیے کیدار ناتھ دھام آیا تھا۔