نیرو مودی کو ایک اور جھٹکا، لندن ہائی کورٹ نے دسویں مرتبہ ضمانت کی درخواست مسترد کر دی

ہندوستان کے مطلوب مفرور معاشی مجرم نیرو مودی کی ضمانت کی درخواست لندن میں ہائی کورٹ آف جسٹس کے کنگز بنچ ڈویژن نے ایک بار پھر مسترد کر دی ہے۔ یہ ان کی 10ویں ضمانت کی درخواست تھی، جسے عدالت نے مسترد کر دیا۔ ہندوستانی  حکومت نے خدشہ ظاہر کیا تھا کہ اگر نیرو مودی کو ضمانت مل گئی تو وہ دوبارہ فرار ہو سکتا ہے۔ عدالت نے اس دلیل کو سنجیدگی سے لیا اور درخواست ضمانت مسترد کر دی۔

اس معاملے میں، کراؤن پراسیکیوشن سروس (سی پی ایس) کے وکیل نے ضمانت کی سخت مخالفت کی، جس کی ہندوستان سے سی بی آئی ٹیم نے بھرپور حمایت کی۔ ٹیم تفتیشی افسران اور لاء افسران پر مشتمل تھی جو اس مخصوص کام کے لیے لندن گئی تھی۔ سی بی آئی نے یہ ثابت کرنے کے لیے مضبوط دلائل پیش کیے کہ نیرو مودی کو ضمانت دینا عدالتی عمل کے لیے نقصان دہ ہو سکتا ہے۔ جس کے نتیجے میں عدالت نے ان کی درخواست ضمانت مسترد کر دی۔

واضح رہے کہ نیرو مودی 19 مارچ 2019 سے برطانوی جیل میں ہے۔ وہ 6498.20 کروڑ روپے کے پنجاب نیشنل بینک (پی این بی) گھوٹالے میں سی بی آئی کو ہندوستان میں مطلوب ہے۔ اسے مفرور معاشی مجرم قرار دیا گیا ہے۔

قابل ذکر ہے کہ برطانیہ کی ہائی کورٹ پہلے ہی ہندوستانی حکومت کے حق میں ان کی حوالگی کی منظوری دے چکی ہے۔ اب یہ معاملہ حتمی رسمی عمل کی طرف بڑھ رہا ہے۔ اس کیس کو ہندوستان کے لاء اینڈ آرڈر اور بین الاقوامی تعاون کے میدان میں ایک بڑی کامیابی کے طور پر دیکھا جا رہا ہے۔