’آئی پی ایل 2025‘ کا نیا شیڈیول آیا سامنے، 3 جون کو کھیلا جائے گا فائنل مقابلہ

ہندوستان اور پاکستان کے درمیان کشیدگی کو پیش نظر رکھتے ہوئے بی سی سی آئی نے گزشتہ 9 مئی کو ’آئی پی ایل 2025‘ ایک ہفتہ کے لیے ملتوی کرنے کا اعلان کیا تھا، اور اب اس ٹورنامنٹ کی نئی تاریخیں جاری کر دی گئی ہیں۔ دونوں ممالک کے درمیان جنگ بندی کے بعد بی سی سی آئی نے بچے ہوئے مقابلوں کے لیے نئے شیڈیول کا اعلان کیا ہے، جس کے مطابق 17 مئی سے ایک بار پھر آئی پی ایل کے میچ شروع ہو جائیں گے۔

بی سی سی آئی نے بقیہ میچوں کے لیے 6 میدانوں کا انتخاب کیا ہے، جس میں بنگلورو، دہلی، لکھنؤ، ممبئی، احمد آباد اور جئے پور شامل ہیں۔ نئے شیڈیول کے مطابق 17 مئی سے لیگ مقابلے شروع ہوں گے، جو کہ 25 مئی تک کھیلے جائیں گے۔ ان میں 2 ڈبل ہیڈر میچ بھی شامل ہیں۔ یعنی 2 دن ایسے ہیں، جب ایک دن میں 2 مقابلے کھیلے جائیں گے۔ پلے آف کے میچ 29 مئی سے شروع ہوں گے اور فائنل مقابلہ 3 جون کو کھیلا جائے گا۔ بی سی سی آئی نے فی الحال یہ اعلان نہیں کیا ہے کہ پلے آف مقابلے کس میدان پر کھیلے جائیں گے۔

آئی پی ایل کے ذریعہ جاری پریس ریلیز میں لکھا گیا ہے کہ ’’بی سی سی آئی کو ٹاٹا آئی پی ایل 2025 کو پھر سے شروع کرنے کا اعلان کرتے ہوئے خوشی ہو رہی ہے۔ مجموعی طور پر 17 مقابلے 6 مقامات پر کھیلے جائیں گے، جو 17 مئی سے شروع ہوں گے اور 3 جون کو فائنل مقابلہ ہوگا۔‘‘ پلے آف مقابلوں کے بارے میں بتایا گیا ہے کہ کوالیفائر-1 مقابلہ 29 مئی کو کھیلا جائے گا، جبکہ الیمنیٹر مقابلہ 30 مئی کو ہوگا۔ کوالیفائر-2 کے لیے یکم جون کی تاریخ مقرر کی گئی ہے، اور پھر فائنل مقابلہ 3 جون کو ہوگا۔