دہلی: ’دہشت گردی کے ساتھ نتیجہ خیز جنگ میں ہندوستان فتحیاب ہوگا‘، راج نواس میں کُل مذاہب اجلاس منعقد

ہندوستان اور پاکستان کے درمیان کشیدہ حالات کو پیش نظر رکھتے ہوئے دہلی کے لیفٹیننٹ گورنر ونئے سکسینہ نے آج ایک اہم اجلاس کا انعقاد کیا۔ لیفٹیننٹ گورنر نے دہلی کی وزیر اعلیٰ کے ساتھ دہلی واقع راج نواس میں ’کُل مذاہب اجلاس‘ کی میزبانی کی، جس میں معزز وزیر منجندر سنگھ سرسا اور چیف سکریٹری بھی موجود تھے۔

اس اجلاس میں جین، بدھ، عیسائی، سکھ، مسلم اور ہندو برادریوں سے تعلق رکھنے والے ممتاز مذہبی پیشوا، سیاسی رہنما اور دہلی کے معزز باشندوں نے شرکت کی۔ ان سبھی نے مل کر پاکستان کے خلاف انتقامی جنگ لڑنے والی ہماری مسلح افواج کے لیے مزید طاقت اور جانبازی کے ساتھ ساتھ ملک کی مجموعی بھلائی کے لیے دعا کی۔ سبھی نے متحد ہو کر ہماری مسلح افواج اور وزیر اعظم نریندر مودی کی فیصلہ کن قیادت پر اپنے گہرے اعتماد کا اظہار بھی کیا اور اس بات پر زور دیا کہ دہشت گردی کے خلاف اس فیصلہ کن لڑائی میں ہندوستان فتحیاب ہوگا۔

اس موقع پر خطاب کرتے ہوئے دہلی کے لیفٹیننٹ گورنر، وزیر اعلیٰ اور تمام مذاہب کے نمائندوں نے اس حقیقت پر زور دیا کہ مختلف مذاہب سے تعلق رکھنے کے باوجود ان کی بنیادی شناخت ایک ہندوستانی کی ہے۔ ساتھ ہی پورا ملک بلا تفریق ذات پات، برادری یا مسلک ہر طرح کی دہشت گردی کے خلاف مسلح افواج کے ساتھ کھڑا ہے۔ اس اجلاس کے آخر میں راج نواس ’بھارت ماتا کی جئے‘، ’وندے ماترم‘ اور ’ہم سب ایک ہیں‘ کی آواز سے گونجتا نظر آیا۔