مہر نیوز ایجنسی کی رپورٹ کے مطابق، ایران کی سیمرغ سوہا کمپنی کے ڈپٹی سی ای او حسین افشار نے ایک انٹرویو کے دوران کہا کہ سیمرغ سوہا نالج بیسڈ کمپنی سویلین ڈرون تیار کرنے والی سب سے بڑی فیکٹری ہے جو سالانہ 2,000 ڈرونز کی تیاری کی صلاحیت رکھتی ہے۔
انہوں نے کہا کہ ہماری ڈرون مصنوعات کو کئی زمروں میں تقسیم کیا گیا ہے، جن میں زرعی ایپلی کیشنز کے لیے ملٹی روٹر ڈرون، جو 10-لیٹر، 20-لیٹر، 30-لیٹر، اور 50-لیٹر مصنوعات کے نام سے مشہور ہیں اور ان کے استعمال کرنے والے سافٹ ویئر بھی مقامی طور پر تیار کیے جاتے ہیں۔
حسین افشار نے متعدد شعبوں میں ملٹی روٹر ڈرونز کی طرف اشارہ کیا جن میں نگرانی، سیکورٹی، اور سرحدی حفاظت کی مصنوعات شامل ہیں۔
انہوں نے کہا کہ ان میں سے کچھ ڈرونز خاص طور پر بارودی سرنگوں اور دیگر منصوبوں میں فلم بندی اور نگرانی کے لیے بنائے گئے ہیں۔
طویل مدتی پرواز اور بھاری پے لوڈز کے قابل ڈرونز کی تعمیر
سیمرغ سوہا کمپنی کے ڈپٹی CEO نے کمپنی کے تیار کردہ ڈرونز کی اقسام کی طرف اشارہ کرتے ہوئے کہا: "شاہین سیریز کے فکسڈ ونگ ڈرون خاص طور پر مختصر فاصلے اور طویل فاصلے تک جاسوسی اور نقشہ سازی کے مشنز اور کارگو کی نقل و حمل کے لیے بنائے گئے ہیں۔
جدید ٹیکنالوجی کا استعمال کرتے ہوئے، یہ ڈرون طویل مدتی پرواز، آپریشنل رینج میں توسیع اور بھاری بوجھ اٹھانے کی صلاحیت رکھتے ہیں۔
ایرانی ڈرون کی عراق اور جنوبی امریکہ کو برآمدات
حسین افشار نے کمپنی کی مصنوعات کی برآمد کی طرف بھی اشارہ کرتے ہوئے کہا کہ ہم برآمدات کے شعبے میں بھی سرگرم ہیں اور اس وقت عراق اور جنوبی امریکہ کو برآمدات جاری ہیں، البتہ ہم اپنی ٹارگٹ مارکیٹوں کو بڑھانے کے لیے کوشاں ہیں۔
انہوں نے مزید کہا کہ ہمیں کولمبیا کو برآمد کرتے وقت آغاز میں ایک سنگین چیلنج کا سامنا کرنا پڑا؛ کیونکہ ہمارے بڑے حریفوں میں سے ایک DJI تھا، جس نے کسانوں کو 22,000 ڈالر میں اپنے ڈرون پیش کیے تھے۔ تاہم، ہم نے اپنی مصنوعات کی منفرد خصوصیات اور صلاحیتوں کو مقامی کسانوں اور تقسیم کاروں کو متعارف کرایا اور آخر کار مارکیٹ شیئر حاصل کرنے میں کامیاب ہوئے۔
