مہر خبررساں ایجنسی کے مطابق، عراقی حکومت نے اسلامی جمہوری ایران کی سلامتی کے تحفظ اور بغداد-تہران سکیورٹی تعاون کو فروغ دینے کے لیے ملک میں ایران مخالف جماعتوں اور گروہوں کی سرگرمیوں پر پابندی عائد کردی ہے۔
عراقی قومی سلامتی کے ادارے کا کہنا ہے کہ ان اقدامات کا مقصد ایران کے ساتھ سرحدی سکیورٹی کو مضبوط بنانا اور دوطرفہ تعلقات کو مزید مستحکم کرنا ہے۔
وزیراعظم ہاؤس اور قومی سلامتی کے مشاورتی دفتر کی جانب سے جاری ایک سرکاری بیان میں سکیورٹی اور فوجی اداروں، بارڈر کنٹرول ایجنسیوں اور کردستان کی علاقائی حکومت کو ہدایت دی گئی ہے کہ وہ اس فیصلے پر مکمل عملدرآمد کو یقینی بنائیں۔
بیان میں کہا گیا ہے کہ ایران مخالف گروہوں کے دفاتر بند کیے جائیں گے اور ان کی ہر قسم کی سیاسی، میڈیا یا فوجی سرگرمیوں پر پابندی ہو گی۔ علاوہ ازیں عراق کی سرزمین کو ایران کے خلاف اشتعال انگیزی یا حملے کے لیے استعمال کرنے سے روکنے کے اقدامات کیے جائیں گے۔ ان گروہوں کی سابقہ سرگرمیوں سے متاثرہ پہاڑی سرحدی علاقوں پر نگرانی سخت کی جائے گی اور بغداد و اربیل کے درمیان سکیورٹی تعاون کو بڑھایا جائے گا۔
یہ فیصلہ ایران کی اس درخواست کے جواب میں کیا گیا ہے جس میں عراق میں موجود ان گروہوں کی سرگرمیوں کے خاتمے کا مطالبہ کیا گیا تھا۔
