دو ایکسپریس ٹرینیں پٹری سے اترنے سے بال بال بچیں، ہوشیار لوکو پائلٹوں نے بچائیں سیکڑوں جانیں
اتر پردیش کے ضلع ہر دوئی میں پیر کی شام ایک بڑا ریل حادثہ اس وقت ٹل گیا جب دو ایکسپریس ٹرینوں کے ہوشیار لوکو پائلٹوں نے وقت رہتے بروقت کارروائی کی اور سینکڑوں مسافروں کی جانیں بچا لیں۔ پولیس نے دعویٰ کیا ہے کہ کچھ نامعلوم شرپسند عناصر نے دلی سے آسام کے ڈبروگڑھ جا رہی راجدھانی ایکسپریس (20504) اور اس کے بعد آنے والی کاٹھ گودام ایکسپریس (15044) کو پٹری سے اتارنے کی سازش رچی تھی۔
واقعہ ہر دوئی کے دلی-لکھنؤ ریلوے روٹ پر دلی کے قریب دلی نگر اور امرتالی اسٹیشنوں کے درمیان پیش آیا۔ پولیس کے مطابق شرپسندوں نے ریل کی پٹری پر ارتھنگ وائر کا استعمال کرتے ہوئے لکڑی کا گٹھا باندھ دیا تھا، تاکہ آنے والی ٹرین کی روانی میں رکاوٹ پیدا ہو اور حادثہ ہو جائے۔
راجدھانی ایکسپریس کے لوکو پائلٹ نے وقت پر پٹری پر رکاوٹ دیکھی اور فوراً ایمرجنسی بریک لگا دیے۔ اس کے بعد وہ خود ٹریک پر اترے، رکاوٹ ہٹائی اور فوری طور پر ریلوے حکام کو اطلاع دی۔ پائلٹ کی حاضر دماغی کی وجہ سے ٹرین میں سوار سیکڑوں مسافر محفوظ رہے۔
اسی علاقے سے کچھ ہی دیر بعد گزرنے والی کاٹھ گودام ایکسپریس کو بھی اسی طرح کی سازش کا نشانہ بنانے کی کوشش کی گئی۔ تاہم ایک بار پھر لوکو پائلٹ کی چوکسی اور بروقت کارروائی سے کوئی حادثہ پیش نہ آیا۔
پولیس سپرنٹنڈنٹ نیرج کمار جادون خود موقع پر پہنچے اور حالات کا جائزہ لیا۔ انہوں نے جائے وقوعہ کا معائنہ کیا اور ریلوے پولیس، ریلوے سیکورٹی فورس (RPF) اور مقامی پولیس کو فوری تحقیقات کا حکم دیا۔
ان کا کہنا تھا کہ اس معاملے کو سنجیدگی سے لیا جا رہا ہے اور مجرموں کو جلد ہی گرفتار کر لیا جائے گا۔ ریل انتظامیہ نے بھی اس واقعے کے بعد سیکورٹی مزید سخت کرنے کے احکامات جاری کر دیے ہیں۔
پولیس کا ماننا ہے کہ یہ دانستہ طور پر کیا گیا خطرناک عمل تھا، جس کا مقصد مسافروں کی زندگیوں کو خطرے میں ڈالنا تھا۔ ٹریک سے حاصل شدہ شواہد کو فارنسک جانچ کے لیے بھیجا جا چکا ہے، تاکہ ملزمان کی شناخت میں مدد مل سکے۔
مسافروں اور مقامی لوگوں نے لوکو پائلٹوں کی حاضر دماغی کو سراہا ہے اور کہا کہ اگر وہ لمحہ بھر بھی تاخیر کرتے تو ایک بڑا سانحہ ہو سکتا تھا۔
یہ واقعہ ریلوے سیکورٹی نظام پر سوال ضرور اٹھاتا ہے، لیکن ساتھ ہی لوکو پائلٹوں کی پیشہ ورانہ مہارت اور فرض شناسی کی ایک زندہ مثال بھی پیش کرتا ہے۔
