آپریشن سندور: ہم نیوکلیئر دھمکی سے نہیں ڈرتے، پاکستان کو 100 کلومیٹر اندر تک مارا، امت شاہ کا بیان

مرکزی وزیر داخلہ امت شاہ نے ایک پروگرام سے خطاب کرتے ہوئے کہا کہ وزیر اعظم مودی نے ہندوستان کو ترقی یافتہ بنانے میں کوئی کسر نہیں چھوڑی ہے۔ ’آپریشن سندور‘ کے حوالے سے انہوں نے کہا کہ فوج نے اینٹ کا جواب پتھر سے دیا۔ فوج کی وجہ سے ہی ہمارا سر فخر سے بلند ہے۔ ساتھ ہی انہوں نے کہا کہ ہم نیوکلیئر دھمکی سے نہیں ڈرتے ہیں۔ امت شاہ کے مطابق ہم نے پاکستان کو اس کے گھر کے اندر 100 کلومیٹر تک داخل ہو کر جواب دیا۔ ہندوستان نے پاکستان کے کئی ایئربیس تباہ کیے، ہمارا ایئر ڈیفنس سسٹم کافی مضبوط ہے۔ یہی وجہ ہے کہ آج پاکستان ڈرا ہوا ہے۔ انہوں نے یہ بھی کہا کہ ’آپریشن سندور‘ نام وزیر اعظم مودی نے دیا تھا۔

مرکزی وزیر داخلہ امت شاہ نے کہا کہ جب سے وزیر اعظم نریندر مودی نے حلف لیا ہے، تب سے دہشت گردوں نے 3 بڑے حملے کیے۔ کچھ روز قبل پہلگام میں پاکستان اسپانسرڈ دہشت گردوں نے حملے کیے، لیکن وزیر اعظم مودی نے ہر حملہ کا جواب دیا۔ امت شاہ کے مطابق جب اُری میں حملہ ہوا تو سرجیکل اسٹرائک کر کے علامتی جواب دیا گیا۔ پلوامہ حملہ ہوا تو ایئر اسٹرائک کر کے وارننگ دی گئی، لیکن پاکستان کے دہشت گرد سدھرے نہیں اور پہلگام میں پھر سے حملہ کیا۔ اس بار ’آپریشن سندور‘ سے ان کے ہیڈ کوارٹر کو نیست و نابود کیا گیا۔

امت شاہ نے مزید کہا کہ ہندوستان نے ’ہندوستانی تہذیب‘ کے حساب سے پاکستان کو جواب دیا ہے۔ ہم نے جیشِ محمد اور لشکرِ طیبہ کے ہیڈ کوارٹر نیست نابود کر دیے، ہم نے 9 ایسے ٹھکانوں کو تباہ کر دیا جہاں دہشت گرد تیار کیے جاتے تھے، ہتھیار چھپائے جاتے تھے۔ یہ کام ہندوستان کے بہادر فوجیوں نے کر دکھایا ہے۔ ساتھ ہی انہوں نے کہا کہ ’آپریشن سندور‘ کے ذریعہ 100 سے زائد دہشت گردوں کو ہلاک کیا گیا۔ آج پوری دنیا ہماری فوج کی بہادری اور ہمارے وزیر اعظم نریندر مودی کے مضبوط سیاسی ارادے کی تعریف کر رہی ہے۔