مکہ مکرمہ: سعودی عرب میں مدینہ سے آنے والے 1850 ایرانی عازمین مکہ پہنچ گئے۔ سعودی عرب میں حج سیزن 2025 کا آغاز ہوچکا ہے۔ دنیا بھر سے عازمین حج کی آمد کا سلسلہ جاری ہے مابقی عازمین کی آمد آئندہ 5 ذی الحجہ تک مملکت کے 3 ایرپورٹس کے ذریعہ جاری رہے گی۔
عرب خبر رساں ادارہ کی رپورٹ کے مطابق ایرانی عازمین حج کا پہلا قافلہ اتوار کو مدینہ منورہ سے مکہ مکرمہ پہنچ گیا ہے۔ اس قافلہ میں تقریباً 1850 ایرانی عازمین شامل ہیں۔ایرانی عازمین حج کے امور کے سربراہ ناصر حویزاوی کا کہنا ہے کہ اس سال ایرانی عازمین حج کی مجموعی تعداد تقریباً 85 ہزار تک پہنچ جائے گی۔
واضح رہے کہ سعودی عرب میں ادارہ حرمین کے شعبہ دینی امور کی جانب سے حج آپریشنل پلان جاری کردیا گیا جو 120 اقدامات پر مشتمل ہے۔ منصوبہ کا مقصد عازمین حج کی بہتر رہنمائی کرنا ہے۔رپورٹ کے مطابق حرمین میں دینی امور کے سربراہ شیخ السدیس نے آپریشنل منصوبہ کا افتتاح کردیا ہے۔
اُن کا کہنا تھا کہ مملکت کی قیادت نے ضیوف الرحمان کی سہولت اور آرام کے لیے تمام وسائل بروئے کار لائے ہیں تاکہ دنیا بھر سے آنے والے عازمین یہاں سے اعتدال پسندی اور انسانیت کا پیغام لے کر جائیں۔شیخ السدیس کا حج آپریشنل پلان سے متعلق کہنا تھا کہ مختلف ممالک سے آنے والے عازمین حج کی سہولت کے لئے متعدد زبانوں میں ڈیجیٹل رہنما ضوابط جاری کیے ہیں جس کے لئے مصنوعی ذہانت سے آراستہ روبوٹس بھی فراہم کیے گئے ہیں۔
روبوٹس‘منارہ’کے دوسرے ورژن کو متعارف کرایا گیا جو گزشتہ برس سے اَپ ڈیٹ ہے اس میں مزید زبانوں کا بھی اضافہ کیا گیا ہے جبکہ سکرینز کے معیار کو بھی بہتر بنایا گیا ہے۔اس کے علاوہ عازمین حج کے لئے 50 علمی و فکری پروگرامز کا بھی اہتمام کیا گیا ہے جبکہ ضیوف الرحمان کی خدمت کے لئے 2 ہزار سے زائد سعودی کارکنوں کو بھی تعینات کیا جائے گا۔
