سڈنی: آسٹریلیائی پولیس نے ملک کے مشرقی ساحل پر ایک کشتی پر سوار پانچ افراد کو ایک ٹن سے زیادہ کوکین کے ساتھ گرفتار کیا ہے۔
آسٹریلیا کی وفاقی پولیس (اے ایف پی) اور نیو ساؤتھ ویلز (این ایس ڈبلیو) کی ریاستی پولیس نے اتوار کو ایک مشترکہ میڈیا ریلیز میں یہ اطلاع دی۔ ریلیز کے مطابق، این ایس ڈبلیو پولیس فورس اور اے ایف پی افسران نے جمعہ کی صبح شمالی این ایس ڈبلیو میں نمبوکا ہیڈز کے ساحل سے تقریباً نو سمندری میل دور جہاز کو روکا۔
کشتی پر کوکین کے تقریباً 1,110 بلاکس ملے جن کا وزن 1,039 کلو گرام تھا اور اس کی مارکیٹ ویلیو6234 لاکھ آسٹریلیائی ڈالر (تقریباً 3997 لاکھامریکی ڈالر) ہے ۔ اس سلسلے میں کشتی سے 24 اور 26 سال کی عمر کے دو افراد کو گرفتار کر کے ساحل پر لایا گیا۔
اسی وقت ساحل پر 28، 29 اور 35 سال کی عمر کے تین دیگر افراد کو گرفتار کیا گیا۔ کشتی پر سوار دو افراد پر بڑی مقدار میں ممنوعہ ادویات سپلائی کرنے اور جرائم پیشہ گروہ میں شمولیت کا الزام عائد کیا گیا ہے۔ دیگر تین افراد پر بڑی مقدار میں ممنوعہ ادویات فراہم کرنے اور جرائم پیشہ گروہ میں حصہ لینے کا الزام عائد کیا گیا ہے۔
این ایس ڈبلیو پولیس نے کہا کہ اس نے 28 اپریل کو جنوبی سڈنی میں بڑی مقدار میں نقدی کے ساتھ 13 میٹر لمبی کشتی کی ’مشتبہ‘ خریداری کے حوالے سے خفیہ اطلاعات موصول ہونے کے بعد تحقیقات کا آغاز کیا۔
اے ایف پی کے اسسٹنٹ کمشنر اسٹیفن ڈیمیٹو نے کہا کہ آسٹریلیا کی وسیع ساحلی پٹی منظم جرائم پیشہ گروہوں کے لیے ’پرکشش‘ ہے، لیکن اسمگلنگ کا طریقہ استعمال کرنے والے مجرموں نے ان کی آزادی اور ان کی زندگی دونوں کو خطرے میں ڈال دیا۔
