جموں، پنجاب، راجستھان کے کئی شہروں پر پاکستان کے ڈرون حملےجن کو ناکام بنا دیا گیا، بلیک آؤٹ نافذ

جیسے جیسے ہندوستان اور پاکستان کے درمیان کشیدگی بڑھ رہی ہے، سلامتی کی صورتحال ابتر ہوتی دکھائی دے رہی ہے۔ جمعہ کی رات جموں و کشمیر، پنجاب اور راجستھان کے کئی شہروں میں ڈرون سے حملے کئے گئے جن کو ناکام بنا دیا گیا ہے ۔ اس کے پیش نظر شہروں میں بلیک آؤٹ نافذ کر دیا گیا اور سائرن بجائے گئے۔ لوگوں سے اپیل کی گئی کہ وہ باہر نہ نکلیں اور محفوظ مقامات پر رہیں۔

بتایا جا رہا ہے کہ پاکستان کی جانب سے جموں، نوشہرہ، سانبہ، اڑی، راجستھان کے پوکھران اور پنجاب کے پٹھانکوٹ میں ڈرون حملے ہوئے ہیں، جنہیں ہندوستانی فوج نے تباہ کر دیا ہے۔ جموں خطہ میں دھماکوں اور سائرن کی آوازیں سننے کے بعد جمعہ کو مسلسل دوسری رات شہر کو بلیک آؤٹ کر دیا گیا۔ حکام نے بتایا کہ پڑوسی پنجاب کے جموں، سانبہ اور پٹھان کوٹ ضلع میں بھی ڈرون دیکھے گئے اور انہیں بے اثر کر دیا گیا ۔ سری نگر میں مساجد کے لاؤڈ اسپیکر کا استعمال مقامی لوگوں سے احتیاطی تدابیر کے طور پر اپنے گھروں کی لائٹس بند کرنے کے لیے کیا گیا۔

پی ٹی آئی کے مطابق، جمعہ کو مسلسل دوسری رات، پاکستان سے آنے والے ایک ڈرون کو راجستھان کے جیسلمیر کے اوپر فضائی دفاعی نظام کے ذریعے درمیان میں ہی روک کر تباہ کر دیا گیا۔ ذرائع نے بتایا کہ دھمکی کے بعد سیکورٹی فورسز نے ریڈ الرٹ جاری کر دیا اور کئی سرحدی اضلاع میں بڑے پیمانے پر بلیک آؤٹ نافذ کر دیا گیا۔ ان کا کہنا تھا کہ پاکستان سے لانچ کیے گئے ڈرون کو ہندوستان کے فضائی دفاعی نظام نے  فضا میں ہی روکا اور اسے تباہ کر دیا۔ پوکھران میں سائرن بجنے لگے اور احتیاطی تدابیر کے طور پر پورے علاقے میں مکمل بلیک آؤٹ نافذ کر دیا گیا۔

تازہ ترین پاکستانی جارحیت کے درمیان، جموں و کشمیر کے وزیر اعلیٰ عمر عبداللہ نے ایکس پر ایک پوسٹ میں کہا، "جہاں سے میں ہوں، وقفے وقفے سے دھماکوں کی آوازیں، غالباً بھاری توپ خانے کی آوازیں سنی جا سکتی ہیں۔” انہوں نے اندھیرے میں ڈوبے ہوئے شہر کی ایک تصویر بھی پوسٹ کی اور کیپشن میں لکھا، "جموں میں اس وقت بلیک آؤٹ ہے، پورے شہر میں سائرن کی آوازیں سنی جا سکتی ہیں۔” ایک اور پوسٹ میں، انہوں نے کہا، "جموں اور اس کے آس پاس کے تمام لوگوں سے میری عاجزانہ اپیل ہے کہ براہ کرم سڑکوں پر نہ نکلیں، گھر پر رہیں یا قریبی جگہ پر جائیں جہاں آپ اگلے چند گھنٹوں کے لیے آرام سے رہ سکیں، افواہوں پر کان نہ دھریں، بے بنیاد یا غیر مصدقہ باتیں نہ پھیلائیں اور ہم مل کر اس سے نمٹیں گے۔”

اس ہفتے کے شروع میں ‘آپریشن سندور’ کے تحت ہندوستان کی جانب سے پاکستان میں دہشت گردی کے کیمپوں پر حملے کے بعد پاکستان کی طرف سے مسلسل گولہ باری جاری ہے۔ 22 اپریل کو پہلگام میں دہشت گردانہ حملے کے جواب میں، ہندوستانی مسلح افواج نے منگل کی رات دیر گئے ‘آپریشن سندور’ کے تحت پاکستان اور پاکستان کے زیر قبضہ کشمیر (پی او کے) میں دہشت گردوں کے نو ٹھکانوں پر میزائل حملے کیے، جس میں بہت سے دہشت گردوں کو ہلاک کر دیا گیا۔