’آپریشن سندور‘: دہشت گردی کو منھ توڑ جواب سے پورے ملک میں خوشی، کرکٹروں نے فوج کو کیا ’سلام‘

پہلگام کے بیسرن میں ہوئے قتل عام کا ہندوستان نے منگل کی آدھی رات پاکستان میں دہشت گرد ٹھکانوں پر حملہ کرکے کرارا جواب دے دیا ہے۔ ہندوستانی مسلح افواج کی اس کارروائی سے پورے ملک میں خوشی ہے۔ 15 دن تک دہشت گردوں کو جواب دینے کا انتظار کر رہے پہلگام حملے میں مارے گئے لوگوں کے اہل خانہ سمیت ملک بھر کے لوگوں کے سینوں میں ٹھنڈک پہنچی ہے۔

ملک کے کئی حصوں کی طرح جموں میں بھی لوگ لمحہ لمحہ کی خبر لے رہے ہیں۔ لوگ اپنے گھروں کی چھتوں پر بھی آ گئے۔ فضائی حملے کے ذریعہ ہندوستان نے پاکستان کو منھ توڑ جواب دیا ہے۔ حملے کے لیے ذمہ دار گروپوں سے جڑے دہشت گرد ڈھانچے کو نشانہ بنا کر یہ آپریشن عین مطابق کیے گئے۔ حکومت ہند نے تصدیق کی ہے کہ سبھی 9 ٹھکانوں پر کامیابی کے ساتھ حملے کیے گئے جس سے پاکستان میں کسی بھی شہری یا فوجی ڈھانچے کو نقصان نہیں پہنچا ہے۔

اس فضائی حملے پر ہندوستانی کرکٹروں نے بھی اپنے رد عمل کا اظہار کیا ہے۔ انہوں نے اس جوابی کارروائی پر مسرت کا اظہار کرتے ہوئے سوشل میڈیا پر پوسٹ کیا ہے جو کافی وائرل ہو رہا ہے۔

سابق کرکٹر آکاش چوپڑہ اور پرگیان اوجھا نے ملک کے تئیں ان کی خدمات کے لیے ہندوستانی فوج کو سلام کیا۔ چوپڑہ اور اوجھا کے علاوہ کولکاتا نائٹ رائڈرس کے اسپنر ورون چکرورتی نے بھی اپنے انسٹا گرام پر ہندوستانی فوج کے ذریعہ جاری ’آپریشن سندور‘ کی تصویر شیئر کی ہے۔

آکاش چوپڑہ نے اپنے ’ایکس‘ پر لکھا کہ ایک ساتھ ہم کھڑے ہیں۔۔۔ جئے ہند۔ وہیں پرگیان اوجھا نے لکھا کہ جئے ہند، جئے ہند کی سینا۔ اس دوران انہوں نے بھی آپریشن سندور کی تصویر ساجھا کی ہے۔ سابق جارحانہ بلے باز وریندر سہواگ نے اپنے سوشل میڈیا پوسٹ میں لکھا، ’’دھرمو رکچھتی رکچھت، جئے ہند کی سینا‘‘۔

اس کے علاوہ گوتم گمبھیر، سریش رینا اور وینکٹیش پرساد نے بھی دہشت گردوں کے خلاف جوابی کارروائی پر خوشی کا اظہار کرتے ہوئے سوشل میڈیا سائٹ ‘ایکس‘ پر اپنے اپنے پوسٹ کیے ہیں۔