کیا ’سی یو ای ٹی یو جی امتحان‘ ہوگا منسوخ! 8 مئی سے امتحان، نہ ایڈمٹ کارڈ آیا اور نہ ہی شیڈول، این ٹی اے خاموش

پورے ملک میں ’سی یو ای ٹی یو جی‘ کا امتحان 8 مئی سے ہونے والا ہے۔ 2 روز بعد شروع ہونے والے اس امتحان سے متعلق این ٹی اے کی جانب سے کوئی تیاری نہیں ہے۔ اب تک نہ تو ایڈمٹ کارڈ آیا ہے اور نہ ہی شیڈول جاری کیا گیا ہے۔ ایسے میں اندیشہ ظاہر کیا جا رہا ہے کہ سی یو ای ٹی یو جی امتحان منسوخ کیا جا سکتا ہے۔ حالانکہ این ٹی اے نے اب تک کوئی آفیشیل نوٹس جاری نہیں کیا ہے۔ ایسے میں امتحان میں شامل ہونے والے طلبہ پس و پیش کا شکار ہیں۔

میڈیا رپورٹ کے مطابق ایک سینئر افسر کا کہنا ہے کہ نیشنل ٹیسٹنگ ایجنسی نے 8 مئی سے یکم جون تک ہونے والی سی یو ای ٹی یو جی 2025 امتحان کا شیڈول تک تیار نہیں کیا ہے۔ اخبار ’دی ٹائمز آف انڈیا‘ کی رپورٹ کے مطابق سی یو ای ٹی امتحان 2025، 5 دنوں کی تاخیر سے اب 13 مئی سے شروع ہوگا۔ امتحان دہندگان جلد ہی آفیشیل ویب سائٹ cuet.nta.nic.in پر ترمیم شدہ سی یو ای ٹی یو جی امتحان کی تاریخ 2025، شیڈول، سٹی سلپ اور ایڈمٹ کارڈ ریلیز پر آفیشیل این ٹی اے نوٹس کی امید کر سکتے ہیں۔ حالانکہ این ٹی اے نے اب تک اس پر کوئی بیان جاری نہیں کیا ہے۔

این ٹی اے یونیورسٹی میں گریجویٹ کورسز میں داخلہ کے لیے سی یو ای ٹی یو جی امتحان کی تیاری کر رہی ہے۔ غور طلب یہ ہے کہ ملک کی کئی ریاستوں نے نتیجہ پہلے ہی جاری کر دیا ہے، اور کئی اسٹیٹ بورڈ ریزلٹ جاری کرنے کے مرحلہ میں ہیں۔ 12ویں میں پاس ہونے والے طلبہ سی یو ای ٹی یو جی کے ذریعہ گریجویشن میں داخلہ لیں گے۔ پورے ملک میں الگ الگ یونیورسٹیوں میں داخلہ لینے کے لیے سی یو ای ٹی کا امتحان دینا لازمی ہے۔ ایسے طلبہ سی یو ای ٹی یو جی امتحان کے سلسلے میں اپڈیٹ جاننا چاہتے ہیں، لیکن این ٹی اے کوئی اپڈیٹ جاری نہیں کر رہا ہے۔