حیدرآباد: تلنگانہ کے سکندرآباد ریلوے اسٹیشن پر گذشتہ روز ایک افسوسناک واقعہ پیش آیا، جہاں ایک مسافر چلتی ٹرین میں سوار ہونے کی کوشش کے دوران پھسل کر شدید زخمی ہوگیا اور بعد ازاں اس کی موت ہوگئی۔
یہ واقعہ اس وقت پیش آیا جب جھارکھنڈ سے تعلق رکھنے والا 30 سالہ پون کمار، پلیٹ فارم نمبر 8 پر داناپور ایکسپریس کا انتظار کر رہا تھا۔
ٹرین کے پہنچنے پر اس نے سوار ہونے کی کوشش کی، تاہم توازن بگڑنے کے باعث وہ پھسل کر ٹرین اور پلیٹ فارم کے درمیان جا گرا۔
مسافر کچھ فاصلہ تک ٹرین کے ساتھ گھسیٹتا رہا، جس پر چوکس مسافروں، ریلوے پروٹیکشن فورس (آر پی ایف) اور ریلوے عملے نے فوری طور پر ٹرین کو روکا اور بچاو کارروائی شروع کی۔
زخمی مسافر کو فوری طور پر گاندھی اسپتال منتقل کیا گیا، جہاں ڈاکٹروں نے اسے مردہ قرار دیا۔سکندرآباد گورنمنٹ ریلوے پولیس (جی آر پی) نے اس واقعہ کی جانچ شروع کر دی۔
