حیدرآباد:گلکنڈہ پولیس اسٹیشن کی حدود میں ایک لرزہ خیز واقعہ سامنے آیا ہے، جہاں ایک 35 سالہ باپ نے اپنی محض 14 دن کی نومولود بیٹی کو بے رحمی سے قتل کر دیا۔
ملزم جگت وِشوکرما، جو نیپال کا باشندہ ہے اور گلشن کالونی میں سیکورٹی گارڈ کے طور پر کام کرتا ہے، نے مبینہ طور پر شراب کے نشے اور غصے کی حالت میں یہ سفاک قدم صرف اس لیے اٹھایا کیونکہ بچی لڑکی تھی۔ اس نے معصوم بچی کو دو ٹکڑوں میں کاٹ کر سات گنبد کے قریب پھینک دیا۔
بچی کی ماں، گوری وِشوکرما نے جب اپنی بیٹی کے لاپتہ ہونے کی شکایت درج کروائی، تو تفتیش کے دوران جگت نے اپنے جرم کا اعتراف کر لیا۔ گوری کا کہنا ہے کہ جگت کو پہلے بھی غصے اور پرتشدد رویے کی عادت تھی۔
فی الحال ملزم پولیس کی حراست میں ہے، اور گلکنڈہ کے اے سی پی سید فیاض نے کیس سے متعلق تفصیلات میڈیا کو فراہم کی ہیں۔
یہ معصوم بچی، جو کسی کے آنگن کی رونق بن سکتی تھی، صرف 14 دن کی عمر میں سفاکیت کا شکار ہو گئی۔ اس واقعے نے نہ صرف قانون کو حرکت میں لا دیا ہے، بلکہ ہمارے معاشرے کے ضمیر کو بھی جھنجھوڑ کر رکھ دیا ہے۔
