نئی دہلی: فوجی کارروائی روکنے کے معاہدے کی چند گھنٹوں میں ہی خلاف ورزی کرنے پر ہندوستان نے ہفتہ کی رات پاکستان کو سخت وارننگ دی کہ اگر وہ جلد ہی صورتحال کو کنٹرول نہیں کرتا تو ہندوستانی مسلح افواج کسی بھی قسم کے جرات مندانہ اقدام کا منہ توڑ جواب دینے سے پیچھے نہیں ہٹیں گی۔
خارجہ سیکرٹری وکرم مسری نے ہفتہ کی دیر رات ورچوئل میڈیا بریفنگ میں کہا، "گزشتہ کچھ دنوں سے جاری فوجی کارروائی کو روکنے کے لیے ہندوستان اور پاکستان کے ڈی جی ایم او کے درمیان آج شام ایک معاہدہ طے پایا۔ لیکن گزشتہ کچھ گھنٹوں سے پاکستان اس معاہدے کی خلاف ورزی کر رہا ہے۔”
مسٹر مسری نے کہا کہ ہندوستانی فوج جوابی کارروائی کر رہی ہے اور سرحد پر اس سے نمٹ رہی ہے۔ یہ خلاف ورزی انتہائی قابل مذمت ہے اور اس کے لیے پاکستان ذمہ دار ہے۔ انہوں نے کہا کہ ہمارا ماننا ہے کہ پاکستان کو اس صورتحال کو ٹھیک سے سمجھنا چاہیے اور اس خلاف ورزی کو روکنے کے لیے فوری طور پر مناسب کارروائی کرنی چاہیے۔
سکرٹری خارجہ نے کہا کہ ہندوستانی مسلح افواج صورتحال پر کڑی نظر رکھے ہوئے ہیں اور انہیں بین الاقوامی سرحد کے ساتھ ساتھ لائن آف کنٹرول پر خلاف ورزیوں کی تکرار سے نمٹنے کے لیے ہدایات دی گئی ہیں۔ انہوں نے کہا کہ فوج سے صورتحال پر نظر رکھنے اور کسی بھی جرات مندانہ اقدام کا منہ توڑ جواب دینے کے لیے کہا گیا ہے۔
