جموں: جموں و کشمیر کے وزیر اعلیٰ عمر عبداللہ نے یونین ٹریٹری میں پاکستانی گولہ باری کے نتیجے میں جانیں گنوانے والوں کے لواحقین کے لیے فی کس 10 لاکھ روپیے ایکس گریشیا کا اعلان کیا۔
واضح رہے کہ گزشتہ چار دنوں میں پاکستانی گولہ باری کے نتیجے میں پونچھ، راجوری، جموں اور بارہمولہ سیکٹرز میں ایک ایڈیشنل ڈسٹرکٹ ڈیولپمنٹ کمشنر اور 19 افراد جاں بحق ہوگئے۔
عمر عبداللہ نے ‘ایکس’ پر ایک پوسٹ میں کہا: ‘ پاکستان کی جانب سے حالیہ گولہ باری سے بے گناہ جانوں کے زیاں پر گہرا دکھ ہوا ہے’۔انہوں نے کہا: ‘ میری حکومت لوگوں کو در پیش مشکلات کو کم کرنے کے لیے ہر ممکن اقدام کر رہی ہے’۔
ان کا پوسٹ میں کہنا ہے: ‘گرچہ کوئی معاوضہ کبھی بھی کسی پیارے کی بھر پائی نہیں کر سکتا اور نہ ہی خاندان کو پہنچنے والے صدمے کو کم کر سکتا ہے تاہم حمایت اور یکجہتی کے اظہار کے طور پر، تمام مہلوکین کے خاندانوں کو 10 لاکھ روپے کی ایکس گریشیا ریلیف فراہم کی جائے گی’۔انہوں نے کہا کہ حکومت اس مصیبت کی گھڑی میں ہر متاثرہ کنبے کے ساتھ کھڑی ہے۔
