واشنگٹن: ٹرمپ انتظامیہ نے ان تارکین وطن کو 1,000 ڈالر سفری امداد کی پیشکش کی ہے جو امریکہ سے رضاکارانہ طور پر خود ہی ڈی پورٹ ہونے کا انتخاب کریں گے۔
غیر ملکی خبر رساں ایجنسی کے مطابق محکمہ ہوم لینڈ سیکیورٹی نے پیر کو کہا کہ تارکین وطن کو یہ پیشکش اس لیے کی گئی ہے کہ اگر انھیں جبری طور پر ملک بدری کے لیے پکڑا جائے گا تو اخراجات بہت زیادہ ہوں گے۔
ہوم لینڈ سیکیورٹی کے مطابق رضاکارانہ طور پر روانہ ہونے والے تارکین وطن کے لیے وظیفے اور ممکنہ ہوائی کرائے پر ملک بدری سے کم لاگت آئے گی، کیوں کہ غیر قانونی تارکین وطن کی گرفتاری، حراست میں لیے جانے اور ملک بدر کیے جانے کی اوسط لاگت فی الحال تقریباً 17,000 ڈالر ہے۔
ڈی ایچ ایس کے مطابق ٹرمپ انتظامیہ نے 20 جنوری سے اب تک 152,000 افراد کو ملک بدر کیا ہے، جو سابقہ بائیڈن انتظامیہ کے تحت گزشتہ سال فروری سے اپریل تک ملک بدر کیے گئے 195,000 سے کم تعداد ہے۔
ہوم لینڈ سیکیورٹی کی سیکریٹری کرسٹی نوم نے ایک بیان میں کہا ’’اگر آپ یہاں غیر قانونی طور پر موجود ہیں تو، گرفتاری سے بچنے کے لیے امریکہ سے خود ہی جلاوطن ہونا بہترین، محفوظ اور سب سے سستا طریقہ ہے۔‘‘
محکمہ نے پیر کو جاری بیان میں یہ بھی کہا کہ غیر قانونی تارکین وطن ’سی بی پی ہوم‘ نامی ایپ کے ذریعے حکومت کو یہ بتاتے ہیں کہ وہ اپنے ملک جانے کا منصوبہ بنا رہے ہیں، انھیں ملک بدری کی فہرست سے ہٹا دیا جائے گا، جو اس لیے ترتیب دی گئی ہے تاکہ سیکیورٹی ایجنسیاں انھیں پکڑ کر ڈی پورٹ کر سکیں۔
