جرمنی میں ہیمبرگ سینٹرل ریلوے اسٹیشن پر چاقو سے حملہ، 12 زخمی، مشتبہ حملہ آور گرفتار

جرمنی کے ہیمبرگ سینٹرل ریلوے اسٹیشن پر جمعہ کی شام ایک حملہ آور نے کئی افراد پر چاقو سے حملہ کر دیا جس کے نتیجے میں کم از کم 12 افراد زخمی ہو گئے۔ پولیس نے مشتبہ حملہ آور کو گرفتار کر لیا ہے اور واقعے کے فوری بعد پورے اسٹیشن کو گھیرے میں لے لیا ہے۔

جرمن اخبار بِلڈ کے مطابق جمعہ کی شام ہیمبرگ ریلوےا سٹیشن پر چاقو کے حملے میں کم از کم 12 افراد زخمی ہو گئے۔ مقامی پولیس نے حملے کی تصدیق کی ہے اور ایک 39 سالہ مشتبہ خاتون کو گرفتار کیا ہے جس کے بارے میں خیال کیا جاتا ہے کہ اس نے یہ واقعہ اکیلے ہی انجام دیا ہے۔

اس کے ساتھ ہی مقامی انتظامیہ نے لوگوں سے اپیل کی ہے کہ وہ جائے حادثہ کے آس پاس چوکس رہیں اور پولیس کی ہدایات پر عمل کریں۔ انتظامیہ کا یہ بھی کہنا تھا کہ پولیس نے واقعے کی تحقیقات شروع کردی ہیں۔رپورٹ کے مطابق حملے میں زخمی ہونے والے تین افراد کی حالت تشویشناک ہے جبکہ تین افراد شدید زخمی ہیں اور دیگر کو معمولی چوٹیں آئی ہیں۔ حملہ آور کے حملے کے پیچھے محرکات ابھی تک واضح نہیں ہوسکے ہیں۔

ہیمبرگ پولیس نے سوشل میڈیا پلیٹ فارم ایکس پر بتایا کہ ایک شخص نے اسٹیشن پر کئی افراد پر چاقو سے حملہ کیا جس سے متعدد افراد زخمی ہوگئے۔ تاہم ملزم کو حراست میں لے لیا گیا ہے۔ پولیس کے مطابق حملہ آور نے اسٹیشن کے ٹریک 13 اور 14 کے درمیان پلیٹ فارم پر موجود لوگوں کو نشانہ بنایا۔جرمن خبر رساں ادارے ڈی پی اے کے مطابق، ہیمبرگ کی فائر سروس نے بتایا کہ حملے میں چھ افراد کو جان لیوا زخم آئے، جب کہ تین دیگر شدید زخمی اور تین کو معمولی چوٹیں آئی ہیں۔