بنگلہ دیش کے محمد یونس کوفرانسیسی صدر میکرون نے دیا زبر دست جھٹکا

ہندوستان کے پڑوسی ملک بنگلہ دیش نے پاکستان اور چین کی حمایت حاصل کرنے کے بعد ہندوستان کو للکارنا شروع کر دیا ہے۔ اسی دوران بنگلہ دیش کی عبوری حکومت کے چیف ایڈوائزر محمد یونس ہندوستان کے خلاف مسلسل زہر اگلتے نظر آ رہے ہیں۔ بنگلہ دیش میں اقتدار سنبھالنے کے بعد یونس نے ہندوستان کے خلاف جھوٹے بیانات دیے ہیں ۔ دوسری جانب یونس حکومت بھی دنیا کے دیگر ممالک تک رسائی حاصل کرنے اور حمایت حاصل کرنے کی کوشش کر رہی ہے لیکن ہندوستان کی مضبوط خارجہ سفارت کاری اتنی طاقتور ہے کہ محمد یونس کی سازش شروع ہونے سے پہلے ہی ناکام بنا دی گئی۔

درحقیقت بنگلہ دیش کے چیف ایڈوائزر محمد یونس اگلے ماہ 9 سے 13 جون تک فرانس کے شہر نیس میں منعقد ہونے والی اقوام متحدہ کی اوشیان کانفرنس (یو این اوشیان سمٹ) میں شرکت کے لیے جانے والے تھے۔ فرانس کے دورے کے دوران ان کی خواہش تھی کہ وہ فرانسیسی صدر ایمانوئل میکرون سے بھی ملیں لیکن ہندوستان کے دوست فرانسیسی صدر ایمانوئل میکرون نے محمد یونس کی خواہش کو ٹھکرا دیا اور اوشیان سمٹ میں دو طرفہ ملاقات میں ان سے ملنے سے انکار کر دیا۔

اکنامک ٹائمز کی رپورٹ کے مطابق میکرون اور محمد یونس کے درمیان دو طرفہ مذاکرات کو حتمی شکل دینے کے بعد محمد یونس کا اگلے ماہ فرانس کا دورہ کرنا تھا۔ تاہم بعد میں یہ اطلاع ملی کہ فرانس نے یونس اور میکرون کے درمیان ہونے والی دو طرفہ بات چیت کو منسوخ کر دیا ہے۔ فرانس کی طرف سے یہ جواب یونس کے لیے بڑا صدمہ تھا۔ اس کے بعد محمد یونس نےاپنا دورہ فرانس منسوخ کر دیا۔

ڈھاکہ ٹریبیون نے اپنی رپورٹ میں ایک ذریعہ کے حوالے سے بتایا کہ ‘فرانس کی جانب سے دعوت نامہ موصول ہونے کے بعد محمد یونس نے فرانسیسی صدر سے دوطرفہ ملاقات کی خواہش کا اظہار بھی کیا، تاہم بعد میں فرانسیسی حکام نے تصدیق کی کہ کئی ممالک سربراہی اجلاس کے دوران صدر میکرون سے ملاقات کے لیے دو طرفہ مذاکرات کی خواہش کا اظہار کر چکے ہیں۔ ایسے میں تمام سلاٹ بھر چکے ہیں اور کوئی سلاٹ باقی نہیں بچا ہے۔

قابل ذکر ہے کہ محمد یونس فرانسیسی صدر  میکرون سے دو طرفہ ملاقات کی آڑ میں سویلین طیارے خریدنا چاہتے تھے لیکن  ہندوستان کے دوست میکرون کو بنگلہ دیش کے منصوبے کا پہلے ہی احساس ہو گیا تھا اور انہوں نے بنگلہ دیش کے ساتھ کوئی معاہدہ کرنے میں کوئی دلچسپی نہیں دکھائی۔