وزیر خارجہ جے شنکر اور افغان وزیر امیر خان متقی کے درمیان پہلی باضابطہ گفتگو، پہلگام حملے کی مذمت پر اظہارِ تشکر

پہلگام میں 22 اپریل کو پیش آئے اس دہشت گرد حملے میں 26 معصوم شہری جاں بحق اور متعدد زخمی ہوئے تھے۔ طالبان حکومت کی جانب سے اس واقعے کی کھلی مذمت کو ہندوستان نے ایک مثبت اور اہم اشارے کے طور پر دیکھا، جس کے بعد دونوں وزرائے خارجہ کے درمیان براہِ راست رابطہ ممکن ہو سکا۔

وزیر خارجہ جے شنکر نے گفتگو کے بعد سماجی رابطے کے پلیٹ فارم ’ایکس‘ پر اپنے پیغام میں کہا، ’’قائم مقام افغان وزیر خارجہ مولوی امیر خان متقی سے شام کے وقت مفید گفتگو ہوئی۔ پہلگام دہشت گرد حملے کی مذمت کا نوٹس لیا گیا۔ افغان عوام کے ساتھ روایتی دوستی اور ترقیاتی تعاون پر زور دیا۔ آئندہ باہمی تعاون کے امکانات پر بھی تبادلہ خیال کیا۔‘‘