دہلی سمیت کئی ریاستوں میں آنے والے دنوں میں آندھی-بارش کے آثار، یوپی میں گرم ہواؤں کا دور

موسم نے ایک بار پھر کروٹ لے لی ہے۔ دہلی این سی آر، اتراکھنڈ، مدھیہ پردیش سمیت ملک کی کئی ریاستوں میں کل ہوا کے ساتھ ہلکی بارش درج کی گئی۔ جنوب مغربی ریاستوں میں مانسون کی جھلک دیکھنے کو ملی ہے۔ محکمہ موسمیات کے مطابق 14 سے 17 مئی تک گرج اور چمک کے ساتھ کئی ریاستوں میں آندھی اور بارش ہو سکتی ہے۔ اس سے بڑھتی گرمی سے تھوڑی راحت ملے گی۔

آئی ایم ڈی کے مطابق مدھیہ پردیش، چھتیس گڑھ اور مہاراشٹر میں 17 مئی تک تیز بارش کی پیشن گوئی ہے۔ وہیں راجدھانی دہلی کا موسم بھی تیزی سے تبدیل ہو رہا ہے۔ محکمہ موسمیات کے مطابق فی الحال آج سے 16 مئی تک دہلی میں بادل رہیں گے لیکن 16 مئی کو بارش ہونے کا امکان ہے۔ اس دوران 40 کلومیٹر فی گھنٹے کی رفتار سے گرد بھری آندھی آئے گی۔ اس کے بعد 16 مئی کو ہلکی بارش ہو سکتی ہے لیکن درجہ حرارت مستحکم رہے گا۔ اس دوران زیادہ سے زیادہ درجہ حرارت 39 سے 41 ڈگری سیلسیس رہنے اور کم سے کم درجہ حرارت 27 سے 28 ڈگری سیلسیس تک بنے رہنے کا امکان ہے۔

بہار کی بات کی جائے تو یہاں موسم کے مختلف انداز ہیں۔ کچھ جگہوں پر شدید گرمی پڑ رہی ہے تو کچھ علاقوں میں بارش ہو رہی ہے۔ یہاں 33 ضلعوں میں یلو الرٹ جاری کیا گیا ہے۔ ان ضلعوں میں تیز ہوائیں چلنے اور بجلی گرنے کا بھی امکان ہے۔

دوسری طرف اتر پردیش کے لیے محکمہ موسمیات نے 14 مئی کو لُو کا الرٹ جاری کیا ہے۔ یہ لُو 15 مئی تک مغربی اتر پردیش کے علاقوں میں پھیل سکتی ہے۔ گرم ہواؤں کا یہ دور 20 مئی تک ریاست میں فعال رہنے کا امکان ہے۔ غازی پور، اعظم گڑھ، مؤ، بلیا، دیوریا، گورکھپور میں لُو کا الرت جاری کیا گیا ہے۔

راجستھان کے سیکر میں بھی گرد آلود آندھی کے ساتھ ہلکی سے درمیانی بارش درج کی گئی ہے۔ آنے والے دنوں میں مغربی راجستھان کے کچھ حصوں میں آندھی-بارش کی سرگرمیوں میں کمی ہونے اور درجہ حرارت میں 2 سے 3 ڈگری سیلسیس کا اضافہ ہونے کا امکان ہے۔ وہیں جودھپور، بیکانیر میں لُو کا الرٹ جاری کیا گیا ہے۔