وزیر اعظم مودی کا اچانک آدم پور ایئربیس کا دورہ، پاکستانی پروپیگنڈے کو منہ توڑ جواب

وزیر اعظم نریندر مودی نے منگل کی صبح پنجاب میں واقع آدم پور ایئربیس کا اچانک دورہ کیا۔ صبح 7 بجے دہلی کے پالم ایئرپورٹ سے روانہ ہو کر وزیر اعظم آدم پور پہنچے، جہاں وہ تقریباً ایک گھنٹے تک موجود رہے۔ اس موقع پر انہوں نے فضائیہ کے جوانوں سے ملاقات کی اور ان کے حوصلے و جذبے کو سراہا۔

وزیر اعظم نے سوشل میڈیا پلیٹ فارم ایکس پر اس دورے سے متعلق تصاویر اور ایک پیغام شیئر کرتے ہوئے لکھا، ’’آج صبح میں آدم پور ایئرفورس اسٹیشن گیا اور ہماری دلیر فضائیہ اور فوجی جوانوں سے ملاقات کی۔ ان کے ساتھ وقت گزارنا ایک خاص تجربہ تھا، کیونکہ وہ بہادری، عزم اور بے خوفی کی مثال ہیں۔ ہندوستان اپنی مسلح افواج کا ہمیشہ شکر گزار ہے۔‘‘